Ethiopia tan hna siamsak tum

Ethiopia ramin raltlan tam tak avanga harsatna a tawh mek sutkianna kawng khat atan Britain, European Union leh World Bank chuan hna thar nuai khat siamsak a tum.

Dollar maktaduai 500 sengin Ethiopia ramah hian industrial park pahnih siam tum a ni a, heng plant-te hian hnathawktu atan raltlan 30,000 an chhawr tel dawn a, hna tam zawk chu Ethiopia ṭhalaite tan dah a ni ang. Ethiopia ramah hian raltlan nuai sarih vel an awm mek a, an zinga a tam ber hi South Sudan, Eritrea leh Somalia ram aṭanga kal an ni.

UK Prime Minister Theresa May chuan project an siam tur chu ram rethei zawk, raltlan tam tak lo dawng-sawngtu puihna tur a nih thu a sawi.

Industrial park siamna tura inremna hi Nilaini khan New York-a UN summit-ah puan a ni a, European Investment Bank (EIB) in loan a pek bakah, UK leh World Bank aṭangin sum an dawng dawn bawk a ni.

EIB president Werner Hoyer chuan Europe pan tum mi tam tak chuan Ethiopia hi chawlh lailawkna atan an hmang a, hei vang hian raltlan tam tak a dawng reng niin a sawi. Project an siam thar hmang chuan raltlan tam tak chuan dinhmun ṭha zawk beiseia ram hla tak tak an pan ṭhin a tihziaaawm beisei a ni a, an ram hnaih zawkah awm a, hna an thawh theih beisei a ni. Hei bakah Ethiopia ram economy pawhin a
ṭhat phah a beisei tih a sawi bawk.