Spain-ah Covid-19 vangin State of emergency puang leh

Spain sorkar chuan Pathianni khan an ramah Covid-19 hri kai an pun chhoh leh tak avangin state of emergency a puang leh. 

Pathianni khan prime minister Pedro Sanchez kaihhruaiin cabinet meeting neih a ni a, an rama hripui leng thawh hnihna thleng mek leh, hri darh zel tur laka inven dan turte an sawiho a ni. Hemi hnu hian PM chuan kar hnih chhung atan state of emergency hi a puang leh ta a ni. 

PM Sanchez chuan emergency chu kar hnih chhung atan puan phawt a nih thu leh, a ṭul chuan Parliament pawmpuinain pawhsei a ni dawn tih a sawi. Nakkum May 9 thleng pawh pawhsei a ngai maithei,a ti.  

Emergency hnuaiah hian Pathianni zan aṭang khan zan lamah curfew puan nghal a ni. Curfew hi Canary Island tih loh, ram chhung hmun dang a huam vek a, zan dar 11 aṭanga a tuk zing dar 6 thleng hman ṭhin a ni ang. 

Spain-ah hian kar liam ta khan hri kai hmuh chhuah mi maktaduai khat an tling tawh a, Europe ram zinga Covid-19 hri kai tamna ber a ni. Hri leng thawh hnihna a thlen leh mek avangin tualchhung thuneitute chuan emergency puang turin sorkar an lo nawr fo tawh a ni. 

State of emergency puan hmang hian in khata cheng ni lo chu mi paruk aia tam awmkhawm khap a ni. District inkalpawhnaah pawh medical thil tih loah chuan khuahkhirhna siam a ni a, mahse district thuneitute chu an district lut tur phalna pek chungchangah thuneihna pek an ni thung. 

Spain-ah hian April thla khan emergency puan a lo ni tawh bawk a, an dinhmun a ziaawm chho hnuah, hri leng hi a hluar chhoh leh tak avangin bial (region) 17-ah inkhuahkhirna khauh tak hman a ni. 

Pathianni thleng khan Spain-a hri kai hmuh tawh hi mi 10,46,132 a ni a, heng zinga mi 34,752 chuan he hri hi an thihpui tawh a ni. 

Europe ram zinga Covid-19  tuar nasa ber zinga mi, Italy-ah chuan hri leng thawh hnihna a thleng chho leh mek a hei vang hian sorkar chuan hri laka mipuite an him theih nan inkhuahkhirhna thar a hmang.

Pathianni khan Italy sorkar chuan inkhuahkhirhna thar a tichhuak a; gym, swimming pool, cinema leh theater-te chu khar vek tura tih a ni. Bar leh restaurant chu Pathianni tiamin zan dar 6-ah khar ngei ngei turin a ti bawk.  Mipui punkhawm  khapna thupek a tichhuak leh bawk  a, heng inkhuahkhirna thar hi nimin aṭang khan hman ṭan nghal niin November 24 thleng hman a ni ang.

Prime minister Giuseppe Conte chuan an ram economy dinhmun thlirin, ram puma inkharkhip (lockdown) puan loh hram a nih theihna atan sorkar chuan hma a la tih a sawi. Khuahkhirhna thar a siamte chu mipuite an zawm ṭhat chuan November thla tawp lamah chuan an rama hri leng thawh hnihna thleng mek pawh chu a ziaawm theih tawh turin an ngai tih a sawi. 

Italy ramah hian tun hnaiah hri kai an pung chho chak leh hle a, chawhrualin nitin  mi 20,000 velin hri an kai thar leh anga chhut a ni.  Pathianni khan hri kai thar hi mi 21,273 an awm a, hri thihpui hi mi 37,338 an awm tawh bawk. 

1)     UK-a Covid-19 hri kai thar chu Pathianni khan mi 19,790 an awm a, anni nen hian hri kai tawh zat hi 8,73,800 an awm tawh.

2)     October 5 aṭang khan Czech Republic-ah chuan emergency puan a ni a, kar liam ta Inrinni khan Covid-19 hri kai thar hi mi 12,472 an awm a, hei vang hian tun kar chho hian lockdown puan an tum leh bawk.

3)     Netherlands-ah Pathianni khan darkar 24 chhungin hri kai thar mi 10,203 an awm tih National Institute for Public Health (RIVM) chuan a tarlang. October 14 aṭang khan Netherlands-ah hian partial lockdown hman a ni.

4)     Kar liam ta Inrinni khan darkar 24 chhungin Germany-a Covid-19 hri kai thar chu mi 11,176 an awm tih Robert Koch Institute chuan a tarlang a, anni nen hian Germany-a hri kai tawh zat hi mi 4,37,866 an awm.