NKorea mipuite in lama tawmim turin hriattir

North Korea sorkar chuan an rama Covid-19 hri a darh loh nan mipuite chu in lama tawmim turin a hriattir a, China aṭanga vut thli rawn tleh chuan hri a ken palh theih thu a tarlang bawk.

NKorea aṭanga kilometre 1,900 hlaa awm Gobi thlaler aṭangin vut thli, yellow dust-te hi an ramah a tleh phei theih thu North Korea thuneitute chuan a tarlangin, he thli  hmang hian Covid-19 hri hi NKorea-ah hian a tleh lut thei a ni, tiin an tarlang.

U.S. Centers for Disease Control and Prevention chuan Covid-19 hri hi boruakah a len theih an rin thu an lo tarlang tawh a ni. Hei vang hian metre hnih dana mihring inawm hlat tur tiin khuahkhirhna pawh siam a ni.  NKorea thuneitute chuan an rama hri a len loh nan hian mipuite chu pawn chhuak lo tura a hriattir bakah, pawn chhuakte chu hmaituam ngei ngei turin a hriattir bawk.

NKorea-ah hian July thla khan Covid-19 hri kai pakhat hmuh a ni a, kha bak chu hri kai an la awm lo nia hriat a ni. An khawpui Pyongyang-ah chuan ramri uluk takin venhim a ni a, quarantine dan chungchang pawh khauh taka kenkawh mek a ni.