US Election 2020 : Mi maktaduai 59 dawnin vote an thlak tawh
US President thlanna, November 3-a neih tur atana vote thlak lawk an ṭhahnem tawh hle a, mi maktaduai 58.7 chuangin vote an thlak tawh.
Kum 2016 inthlan aiin vote thlak lawk hi an tam zawk hle a, mail hmanga vote thlak a tam avangin vote chhiar hun pawh hi a duhrei phah dawn nia sawi a ni. Vote thlak ni, November 3 zanah full result hi a hriat hman loh mai thei nia sawi a ni.
Kum 2016 inthlanah khan vote thlak lawk hi mi mtd 58.3 an awm a, hei hian vote-by-mail pawh a huam tel vek. Vote thlak lawk hi vote tla aṭanga 42% vel a tling.
Kuminah hian vote thlak lawk hi maktaduai 58.7 an awm tawh a, hetih lai hian inthlan ni atana ruat hi kar khat zetin a la dang a, vote thlak lawk pawh hi an la pun chhoh rin a ni. Hripui leng vanga mipui pungkhawmna tamnate pumpelh an duh avangin kuminah hian vote lo thlak lawk hi an tam zual phah nia ngaih a ni.
Vote thlak lawk, mi maktaduai 58.7 zingah 54% chu Presidential can-didate pahnih, Republican Donald Trump leh Democrats Joe Biden-te in hnehtawk zualna state 14 aṭangin a ni.
Heng zingah hian Minnesota-ah vote thlak tawh hi an tam ber tawh a ni. Inthlan hmasa aiin heng state 14-ah hian kum 30 hnuai lam vote thlak lawk an tam.
Inthlan ni thlen hmaa vote lo thlak lawk zinga 70% chu Democrats lam mi niin, Republican lam aṭanga vote thlak tawh hi 20% vel an ni thung.