US hmalaknain Azerbaijan leh Armenia ramten Nagorno-Karabakh ah inkahhai an puang

Azerbaijan leh Armenia ramte chu Nagorno-Karabakh inchuha hun eng emaw chen an indo hnuah, US hmalaknain ram pahnihte hian inkahhai puan an remti.

Ram pahnih sorkar leh US State Department-in thuchhuah inṭawm an siamah inkahhai puan an remtih thu hi sawiin, nimin aṭang khan hman ṭan a ni. 

Kar liam ta Inrinni khan Nagorno-Karabakh biala inremna zawngin US Deputy Secretary of State Stephen Biegun, Armenian Foreign Minister Zohrab Mnatsakanyan leh Azerbaijani Foreign Minister Jeyhun Bayramov-te chuan Washington-ah meeting an nei  a, inremna hi an siam thei ta niin State Department chuan a tarlang. 

Ram pahnihte hian a hmain inkahhai hi ṭum hnih an lo puang tawh bawk a,  mahse an inremna hi bawhchhe nghalin, an inkap zui leh nghal tho a ni. 

OSCE Minsk Group chuan thuchhuah hran siam  bawkin, Nagorno-Karabakh chung chang sawihoin October 29 hian member ram foreign minister leh co-chair ten meeting an nei dawn tih an sawi. He meeting-ah hian inkahhai puan a nih theih dan tur te, inkahhai puan endiktu tur ruat te, ram pahnihte inkar buaina chinfel dan turte sawiho a nih tur thu an tarlang. 

Nagorno-Karabakh inchuh hian ram pahnihte hi hun rei tak aṭangin an lo intibuai tawh a ni. Kumin September thla aṭang khan inbei thar lehin, an inbeihnaah hian civil mi tam tak an thi tawh a, mi sang tel chu hmun him lamah an tlanchhe tawh bawk. An ram inchuh, Nagorno-Karabakh hi khawvelin Azerbaijan rama a pawm a ni a, mahse he biala cheng tam ber hi Armenia hnam an ni. 

Kum 1980 chho leh 1990 khan ram pahnihte hi he bial inchuh hian an lo indo tawh a ni. Bial mipuite vote laknaah Armenia rama beh duh an tam zawk a, mahse hei hi Azerbaijan chuan pawm loin indona a thlen phah a, kum 1994 khan inkahhai an puang a ni. Hemi hnu hian  Nagorno-Karabakh hi Azerbaijan ramah a bet chhunzawm zel a, mahse Armenian sorkarin a thlawp Armenian helte chuan ro an rel a ni. Ram pahnihte hian vawi tam tak inremna zawngin inbiakna lo neih tawh mah se, tun thlengin inremna hi an la siam thei lo. 

Armenia ram hi Kristian tamna niin, Azerbaijan hi Mus­lim tamna ram a ni thung.