Israel-in Gaza-a chhawmdawlna lut tur a dang

Israel leh Hamas-in Gaza Strip-a inkahhai an puan thawh khatna chu Inrinni, March 1, 2025 khan a tawp ta a, hei vang hian Israel chuan Gaza Strip-a chhawmdawlna lut tur zawng zawng pawh a dang nghal.

Israel prime minister Benjamin Netanyahu office chuan US president Donald Trump-a palai, Steve Witkoff-a'n inkahhai thawh khatna a tawp hnuah pawhsei lailawk tura rawtna a siam chu Hamas lamin an pawm duh lo tih a sawi. Hei vang hian Gaza ramri-te pawh a dang zui ta a ni.

Hetih lai hian Hamas thupuangtu chuan Witkoff rawtna hi in 'blackmail' na, inkahhai kalpuina tura inremna thuthlung an lo siam tawh hnawl tumna a ni, a ti. Israel chu Gaza-a chhawmdawlna thawn luh chhunzawm a nih theihna atana Israel nawr turin palai hna thawktute a ngen bawk.

Hamas hian inremna an lo siam tawh anga inkahhai thawh hnihna chu kalpui chhunzawm an phut a ni. Ruahman lawk ang chuan a thawh hnihnaah hian Israel leh Hamas hian tang an in thleng chhunzawm leh dwn a, hei bakah Gaza Strip aṭangin Israel sipaite an inhnukdawk bawk ang. He ruahman lawk tawh anga kalpui a nih dawn loh chuan, inkahhai thawh khatna pawhsei chu an duh lo tih an sawi.