White House-in Snowden ngaidam tura ngenna a hnawl

White House chuan US sorkar thuruk puangzartu, intelligence contractor hlui Edward Snowden-a ngaidam tura petition thehluh chu a hnawl.

Snowden hian jour­nalist-te hnena US sur­veil­lance programme chung­changa document eng emaw zat a hrilh ruk hnuah, ram pawn lamah a tlan­chhia a, Russia sorkarin an rama inhumhim a dilna chu phalsakin tun thleng hian a la awm a ni.

Snowden-a ngaidam tura US sorkar hnena peti­tion thehluhah hian mi 168,000 velin hming an ziah hnan a ni.

Mahse Homeland security and counter-ter­rorism advisor, Lisa Mo­naco chuan, "Snowden-a'n ram thuruk ru chhuak a, puan­zar duhna rilru a nei hi thil hlauhawm tak a ni. A thiltih hian kan ram security lamah nghawng nasa tak a nei a ni," a ti. Russia rama biru mek, Snowden chu a thiltihin a nghawngte hmachhawn ngam lo a, tlanchhiaah a puh bawk.

Monaco-i chuan, "Snow­­den chuan a thiltih chu thil ṭha nia a hria a nih chuan midangte tih ang bawkin sorkar chu a bei let ve mai tur a ni. A thil vei chungchangte chu sawichhuakin, awmze neiin lungawi lohna pawh a lantir zawk mai tur a ni a, chu aia pawimawh chu a thiltihin a nghawngte a dawngsawng ngam tur a ni," a ti. Midangte thu­neihna hnuaiah biru loin, US-ah kirin a chung­chang thu reltute hma­chhawn ngam turin a ti.

US sorkar chuan Snowden hi National Security Agency spying programme a puanzar avangin hacker leh phatsantu-ah a puh a ni.