Malaysia PM-in a deputy a ban
Sum tichingpena puh, Malaysia Prime Minister Najib Razak chuan Thawhṭanni khan a deputy, Muhyiddin Yassin a ban.
PM Razak hi state investment fund, dollar matkaduai 700 vel tichingpena puh a ni a, hemi chungchangah hian a deputy Yassin chuan PM hi a sawisel a ni.
Razak hi kum 2009-a a siam, 1MDB fund aṭangin sum tam tham tak a personal account-a a dahah puh a ni a, mahse an puhna hi a pha thung.
Sum tichingpena PM puh a nih chungchang chhuitu, Attorney General Abdul Gani Patail pawh ban a ni bawk.
Deputy PM a ban chhan hi television-ah sawifiahin, PM Najib chuan, "Ngaihdan inang lo awmte chu mipuite vantlang hmaah ualau taka sawichhuah mai tur a ni lo a, hei hi sorkar mawhphurhna palzut zawnga thiltih a ni," a ti. A deputy banna tura thutlukna siam chu thil harsa tak a nih thu sawiin, hma lam pan tur chuan a tih ngei a ngai a ni, a ti.
Muhyiddin Yassin thlaktu atan hian home minister hlui, Zahid Hamidi ruat nghal a ni. PM hian a cabinet siksawi nghalin, minister pali-te chu a thlak nghal bawk.