Britain Parliament-in Bexit Bill pawm fel ta Law-ah chantir a ni thuai dawn
Hun rei tak an buaipui hnuah, Britain Parliament chuan Nilaini khan European Union aṭanga an inlakchhuahna tur, EU Withdrawal Agreement Bill chu a pawm ta.
House of Common chuan bill hi a lo pawm tawh a, upper House of Lords chuan a ṭhen lo siamthain a thawn kir leh a, mahse Nilaini khan House of Commons chuan a siamṭhatte hi hnawlin, thlak danglam lohin an pawm leh ta a ni. Lords chuan he hi ngaituah ṭha leh turin la ti thei mah se, ti loin bill chu kaltlang a remti ve ta a ni.
Parliament-in a pawm tak bill hi Queen Elizabeth-II in a pawmpuina, Royal Assent a pek hnuah law a ni tawh dawn a ni. Prime minister Boris Johnson chuan Withdrawal Agreement Bill pass a nih tak avangin, ruahman lawk angin January 31 hian EU chu an chhuahsan thei dawn ta tih a sawi.
EU aṭanga Britain inlakhran tur chungchang hi Britain Parliament-ah ihan kum thum chhung zet buaipui a lo ni tawh a ni. PM hlui Theresa May-i pawhin Withdrawal Agreement a siamte Parliament-in a pawmpui theih loh vang hian PM a nihna aṭangin a lo ban phah tawh bawk. Nikum December thlaa inthlanpui an neihah khan Johnson-a kaihhruai Conservatives chuan majority a neih theih tak vangin hun rei tak an tihfel theih loh, Brexit deal chu Parliament-ah pawh pawm a lo ni thei ta a ni. Brexit deal chungchangah hian January 29-ah EU Parliament chuan vote a la ve leh dawn a ni.