Nepal festival-ah rana inthawi a khap dawn

Nepal chuan Gadhimai festival-a ransaa an inthawi ṭhin chu khap a tum.

Gadhimai festival hi kum nga dana neih ṭhin a ni a, kum 300 chuang he kût hi an lo hmang tawh a ni. Festival-ah hian inthawina atana ransa an talh ṭhin avangin festival chhung hian ransa nuai tel an tihlum tawh a ni.

Thawhlehni khan Gadhimai Temple Trust chuan festival hmanga kalte chu inthawina tur ransa keng tawh lo turin a ngen. Thuchhuah siamin, trust chairman Ram Chandra Shah chuan, "Inthawina atana ransa hman ṭhin chu tihtawp kan rel a ni. Hei vang kum 2019-a Gadhimai festival neih hunah pawh ransa tihhlum a awm tawh lo ang," a ti.

Shah chuan, "Kut hmangtute hian pathiannu Gadhimai malsawmna dilna atan inthawi nan ransa an hlan ṭhin. Mahse ransa tihhlum hi ṭha kan ti tawh lo a, hun rei tak kan lo hman tawh chu thlak danglam a hun tawh a ni. Ransa tihlum a, kût kan hman ṭhin chu hlim taka inpawlkhawmna hun atana siam danglam a ngai tawh a ni," a ti.

Animal right activist-te chuan temple trust thutlukna chu lawmawm an tih thu an sawi a, hemi rual hian festival-a kal ṭhin mipuite hnenah zirtirna pek ṭhat a ngai nasa dawn a ni, an ti.