Charlotte-ah nawrh huaihawt chhunzawm

Police-te'n mihang an kahhlum avanga North Carolina, US-a Charlotte khuaa nawrh huaihawt chu Ningani khan neih chhunzawm a ni a, mahse buaina liantham chhuak a awm tawh lo.

Thawhlehni khan police officer pakhatin mihang Keith Lamont Scott a kaphlum a, Thawhlehni zan aṭang khan mipui thinrimten lungawi lohna lantirin buaina nasa tak a chhuak a, Charlotte khuaah hian emergency puan a ngaih phah a ni.

Ningani zan khan mipui lungawi lo te hi Bank of America headquarters bulah an pungkhawm a, a hnuah city government center building kawtah an insawn a ni. Buaina chhuak tur vengthawngin mayor chuan zanlai aṭanga a tuk zing dar 6 thleng curfew a puang tawh bawk.

Mipui kalkhawmte chuan Scott kahhlum anih lai lanna video chu tlangzarh turin police-te an phut. Police-te chuan Scott hian ralthuam a keng a, vawi tam tak dahthla tura an hrilh hnuah a dah duh lo a, a silai keng chunga car aṭanga a rawn chhuak chu an lo kap niin an sawi. Mahse Scott-a chhungte chuan hei hi thu dik lo niin an sawi thung a, kahhlum a nih lai hian ralthuam a keng lo a, lehkha a chhiar niin an sawi.

Video footage hi a chhungte chu entir an ni tawh a, mahse mipui chuan vantlang hmuh theih tura tlangzarh turin an phut a ni. Police hotu Kerr Putney chuan footage hi tlangzarh a nih chuan an thil chhuina kawngah harsatna a thlen thei a ni tiin, chhan ṭha tawk tak a awm nia an hriat hunah mipui hmuh theih tura an tlangzarh tur thu a sawi.