Israel PM-in Knesset-a thu sawi turin Abbas a sawm

Israel Prime Minister Benjamin Netanyahu chuan Palestinian President Mahmoud Abbas chu Israel parliament, Knesset-a thu sawi turin a sawm.

Ningani khan Netanyahu hian New York-a UN General Assembly neih mekah thu a sawi a, Abbas-a thu sawi tura a sawmna pawh hi a sawichhuak tel a ni.

Mahse Palestinian lam chuan Israel PM sawmna hi an hnawl nghal tih an sawi a, a sawmna siam dan chu Middle East remna a awm theihna tura hma lak meknaah a tih tak tak loh zia leh, lemchanna mai a ni tih an sawi.

Netanyahu-a'n thu a sawi zawh hian Abbas hian thu a sawi ve leh nghal a, ram pahnih hruaitute chu inremna siam tura inbiakna, kum hnih zet chhunzawm theih loa tih tangkhang a nih chungchangah an inpuh tawn nasa hle. Abbas chuan inremna siam tura inbiak chu a peih reng thu a sawi bawk.

Israel-in a ram luaha Juda-te chenna in a sak sak ṭhin titawp tura phutna chu Israel PM chuan a hnawl a, 1967 border chu Israel leh Palestinian state dinna tura inbiakna tlawhchhanna tura an pawm loh thu a sawi a, Jerusalem ṭhendarh an remti dawn lo tih a sawi.

Abbas chuan Juda-te in sakna policy kalpui chu na takin a sawi≠sel a, Israel-Palestinian buaina chinfel a nih theihnan atan United Nations chu nasa taka inrawlh turin a ngen a, mahse Netanayhu chuan hei hi a pawm lo thung. Israel-in Palestinian ram a luahsak hi kumin June kha a kum 50-na a ni.