Bangkok-in tlawhtu khualzin ngah ber dawn

Khawvela khawpui hrang hrang zingah Bangkok chu kumin chhunga khualzinten an tlawh nasat ber tura ngaih a ni a, London-in a dawt.

2016 MasterCard Global Destination Cities Index tihchhuahah, Bangkok khawpui chu kumin chhungin khualzin maktaduai 21.47 velin an tlawh rin a nih thu tarlang a ni. A dawttu London khawpui chuan tlawhtu maktaduai 19.88 vela neih rin a ni.

MasterCard Advisors' senior vice president for Asia Pacific, Eric Schneider chuan kum 2005 aṭang khan Asia Pacific chu tourism lamah a
ṭhang chak hle tih a sawi. Khawpui tlawhtu ngah tura rin top 10 thlan chhuahah hian Asia Pacific aṭangin khawpui pasarih an lang a ni.

Index chuan khawpui tlawh tur ngah zual 20 zingah hian khualzin tam zawk chu hnathawh leh sumdawnna lam aiin chawl hahdam tura kal an ni tih a sawi. Bangkok khawpui tlawhtu khualzin 85.6% pawh chawlh hmanga kal an ni a, hetihlai hian Shanghai khawpui tlawhtu tam zawk chu sumdawnna thila kal an ni thung.