KHAWVEL Lawrkhawm

Khawvel mipui 90% chuangin boruak tha lo hip lut

World Health Organization chuan khawvel mipui 90% chuang boruak hip luh chu a ṭha tawk lo tih a sawi a, kumtin mi maktaduai ruk chuang thihna chu boruak thianghlim tawk lo kaihhnawih thil vang niin a tarlang.

Report hi khawvel ram hrang hranga hmun 3,000 chuanga data lakkhawm aṭanga siam a ni a, ram changkang aiin ram rethei zawkah boruak a bawlhhlawh zawk a, mahse ram tinah boruak hi a thianghlim tawk lo vek a ni. Mi 92% chu WHO in air quality level bithliah a siam chin aia a sanna hmunah an awm a ni.

Africa sai an kiam chak

International Union for Conservation of Nature (IUCN) chuan Africa sai chu kum 25 kalta chhung khan an kiam nasa hle tih a sawi a, a chhan ber chu sapeltute vang a ni, a ti.

Africa khawmuala ram hrang hranga sai awm zat chu 415,000 vel nia chhut a ni a, kum sawm kalta aiin 111,000 in an tlem tawh zawk. IUCN chuan sai ngho duh vangin sapeltute sai tam tak an tihhlum a, hei bakah hian an awmna hmun leh ei tur ṭha tawk lo chu an kiam phah bawk.

Texas-ah mi pakua kap hliam

Texas-a Houston khawpuiah Thawhṭanni zing khan lawyer pakhatin mipui awmkhawmna hmunah silai a pawng kah a, mi pakuain hliam an tuar. Silai hmetpuaktu hi police-te'n an kaphlum ve nghal a ni.

Houston Police hotu Marth Montalvo chuan lawyer hi a thawhna firm nena intihthiam lohna an nei a, hei vang hian a rilru lamah buaina a nei nia a lan thu a sawi. Hliam tuar zinga paruk-te hi damdawi-inah enkawl zui an ni a, an zinga pahnih chu an ngaihtuahawm hle.