Trump leh Clinton-te'n debate hmasa ber nei

US President thlanna neih tura Republican party candidate Donald Trump-a leh Democractic party canidate Hillary Clinton-i te chuan Thawhṭanni zan khan Long Island, New York-a Hofsra University-ah presidential debate hmasa ber an nei. Presidential debate hi ṭum thum an nei dawn a ni.

President candidate pahnihte hi an inbei nasa hle a, US President atana tling tawk loah an inpuh tawn. Debate vawi khatnaah hian law, tax leh job chungchang an sawi deuh ber.

Hillary Clinton-i chuan moderator Lester Holt hnen aṭangin debate zawhna a dawng hmasa a, America rama hnathawktute tana hna ṭha zawk siamsakna tura a ruahmanna te a zawt a ni. Clinton-i chuan hmeichhe hnathawkte tana hlawh ṭha zawk siam a tum thu te, mi hausate chhiah pek tihpun a tum thute a sawi. Donald Trump pawhin hna tam zawk siam a tum thu sawiin, Mexico leh ram dangte chuan an rama hnathawh tur tam tak chu an ruksak a ni tiin, hei hi tihtawp a ngaih thu a sawi. Chhiah lak tihniam a tum thu leh, hlawhbi mumal tak siam a tum thu a sawi bawk.

US-a mihang leh mingo inkara boruak ṭha zawk siam tur chuan tih tur pahnih a awm tih Clinton chuan a sawi a, chu chu police leh mihang inkara inrintawnna siam leh, silai khuahkhirhna dan siam a ni, a ti. African-American mi tam tak thina chhan pakhat chu silai hmanga pawikhawihna thlen vang a ni, a ti. Trump chuan chi inthiarna awm tireh tur chuan dan leh thupek kenkawh a pawimawh hle tih a sawi a, tunah chuan police-te chuan engmah pawh an ti ngam lo a ni, a ti.

Clinton-i chuan Trump chu politics a luhchilh tirah chi inthliarna lam hawia dawt sawiah a puh a, Trump chuan US-a mihang president hmasa ber, Barack Obama chu American citizen ni lo leh, US pawn lama piang niin a puh a ni, a ti. Tunhma lam pawha chi inthliarna lam hawi thila inhnamhnawihna lo nei fo tawhah a puh bawk. Hemi chungchang hi Trump chuan a sawi thui ve lo a, mahse a thusawi avanga President Obama'n a birth certificate a tihlan phah avangin a thil tih chu a ṭha hle niin a sawi.

Canidate pahnihte hian October 9 leh 19 hian debate hi an nei leh ang.