Chin hriat loha bo zirlai chhungten kawng zawh

Mexico rama kum hnih liamtaa chin hriat loa bo, zirlai 43 te chu hmuh sak leh ngei tura sorkar phutin Thawhṭanni khan zirlai chhungten kawng an zawh.

Mexico City-a kawngzawhnaah hian zirlai chhungte bakah zirlai pawlte leh an mahni thlawptu mi tam tak an tel. Mexico sorkar chuan zirlaite hi police-te'n ruihhlo tawlhrutu pawlte hnenah an hlan a, an ni hian lo thatin an ruang pawh an halsak tawh niin a sawi. Mahse international expert-te chuan a dik an rin loh thu an sawi a, zirlai chhungte pawhin an pawm thei lo a ni.

Zirlai chhungte aiawha thu sawitu, Felipe de la Cruz chuan an chhungte hmuhsak tura kum hnih chhung sorkar nawr a ngai chu an tan chuan a rei hle tih a sawi a, hun khirh leh hrehawm tak an hmachhawn reng a ni, a ti.

Mexico sorkar chuan zirlaite bo kaihhnawihah hian mi 128 a man tawh a, an zinga a tam zawk chu police officer leh zirlai thattua puh, ruihhlo tawlhrutu pawl member te an ni.