Trump-a'n Israel khawpuiah Jerusalem pawm a tiam

US Republican presidential candidate Donald Trump chuan US President atana thlan tlin a nih chuan, Jerusalem chu Israel ram pum khawpuiah a pawm dawn tih a sawi.

Pathiani khan Donald Trump leh Israel Prime Minister Benjamin Netanyahu-te hi Trump Tower-ah an inkawm a ni. An inkawm zawh hnua a thuchhuah siamah, Trump chuan Jerusalem chu kum 3,000 chuang Israel ram khawpui a lo ni tawh tih a pawmpui a, inthlana hnehna a chang a nih chuan Trump-a kaihhruai US chuan Jerusalem chu Israel ram khawpuiah a pawm dawn a ni, a ti.

Israel chuan Jerusalem khawchhak lam bial hi kum 1967-a Arab-Israel indo lai khan a laksak a, kum 1980 khan Jerusalem khawpuiah beh tirin, Jerusalem pum chu Israel khawpui a ni tih a puang zui a ni.

US leh UN member dangte chuan Israel-in Jerusalem khawchhak lam a lakbelh chu an pawmpui lo a, Israel-Palestinian inremna siam turah pawh Jerusalem chungchang chu rel fel tur pawimawh berah an dah a ni.

Kum 1995, October thla khan US Congress chuan Jerusalem chu Israel khawpuia pawm a nihna tur dan an siam chu a pass a, Tel Aviv aṭanga Jerusalem-a US embassy sawnna tur sum pawh pechhuak turin an rel a ni. Mahse tun thlengin Congress-in dan a lo pass tawh hi an pass hnuah President ni tawhte chuan a takin an la kalpui lo.

Netanyahu-a office pawhin Trump nena meeting an neih zawh hnu hian thuchhuah a siam a, mahse Jerusalem chungchanga Trump-a thutiam erawh a tarlang tel lo. "PM Netanyahu chuan Trump chu security chungchang a sawipui a, Middle East-a boruak muanawm a awm theih dan turte an sawidun a ni" a ti.