Colombia sorkar leh Farc helten inremna ziak

Colombia sorkar leh hun rek tak sorkar laka hel tawh, Farc helpawl chuan nimin khan inremna thuthlung an ziak ta.

Inremna hi Colombia President Juan Manuel Santos leh Farc hruaitu, Timochekoa tia hriat lar, Timoleon Jimenez-te'n an ziak a ni.

President Santos chuan kum 50 chuang zet sorkar laka hel, Farc nena inremna an siam thei ta chu lawmawm a tih thu sawiin, inremna chuan ram enconomy thlengin nghawng ṭha tak a nei dawn a ni, a ti. Hemi rual hian kum 50 chuang zet tualchhung buaina an tawh tawh avangin indinthar leh tur chuan hun a duh rei dawn tih a sawi.

Sorkar leh hel aiawhte hi inremna siam tumin kum li zet an inbe tawh a, August 24 khan Cuba khawpui Havana-a an inbiaknaah inremna siam hi an remti thei ta a ni. Inremna siam an remtih aṭanga ni nga hnuah inkahhai puan nghal a ni bawk. Colombia mipui 65%-70% te chuan inremna siam hi an thlawp niin President chuan a sawi.

Kum 50 chuang zet Farc hel leh sorkar sipaite inbeihna avang hian mi 220,000-in nunna an chan a, himna zawngin mi maktaduai ruk an tlanchhe bawk.