Khawvel Lawrkhawm

Japan-ah thalai pawn chhuak duh lo an tam

Japan rama ṭhalai nuai 500 chuang zet chuan pawnchhuak lo a, mahnia ina awm an thlang zawk.

Japan sorkar buatsaiha survey neihah, ṭhalai tam tak chu thla ruk chhung zet school, hnathawhna leh pawn lama chhuak loin inah an tawm niin Health, Labor and Welfare Ministry chuan a tarlang. Midangte tlawhpawh loa mahnia inkhunghrang hi kum 15-29 inkar mi 541,000 zet an awm a ni. Heng mite awmdan hi hikikomori vei nia sawi a ni a, mahse natna chi khat anga puan a la ni lo a, a enkawlna tur pawh sawi≠chhuah a la awm lo. Hikikomori veite hian midangte kawm aiin mahnia video game khelh emaw, comics bu chhiar emaw te an thlang zawk a ni.

Charlotte-ah curfew hlip

US police-te'n mihang, Keith Lamont Scott an kahhlum avanga buaina chhuahna , North Carolina state-a Charlotte khawpui-a curfew puan chu Pathianni zan khan hlih a ni.

Mayor Jennifer Roberts leh Mecklenburg Board of County Commissioners chairman Trevor Fuller-te chuan thuchhuah inṭawm siamin, tualchhung mipuite chu buaina chawk chhuak tawh lo tur leh, dan anga taka thil kalpui a nih theihna atana thawhpui turin an sawm. Pathianni khan mi ṭhenkhatin lungawi lohna lantir chhunzawm leh mah se, boruak duhawm lo thleng a awm lo.

Hungary PM-in refugee city siam rawt

Hungary Prime Minister Viktor Orban chuan Europrean Union chuan Libya tuipui kamah refugee city siam se a duh tih a sawi.

Europe pan tum, raltlante lo chawlh lailawkna tur Libya rama raltlan khawpui lian tak siam a rawt chu Libya sorkar chu enkawl tir ni se tiin Orban chuan a sawi. Hungary hian an rama raltlan leh pem luh tumte a khuahkhirh mek a, an ram chhim lam ramri-te chu thirhlingneia an hung vek bakah uifing an dah bawk.

Raltlan pung chak avangin Europe ram hrang hrangten harsatna an tawk tawh a, ram eng emaw zat chuan raltlan luh tur danna ramri te an khar a ni.