Afghanistan-ah al-Qaida hruaitu Abu Muhsin al-Masri that

Afghanistan-a National Directorate of Security (NDS) chuan an special unit security force-ten Ghazni province-ah Al-Qaida senior leader Abu Muhsin al-Masri  an that tih nimin khan a tarlang.

Al-Masri, Husam Abd-al-Ra’uf tih bawk hi Egypt mi a ni a,  US-a Federal Bureau of Investigation (FBI)-ten Most Wanted Terrorists list-a an dah a ni. Kar liam ta Inrinni aṭang khan Ghazni province-ah security force-te chuan special operation an nei a, he operation-ah hian al-Masri hi thah a nih thu US National Counter-Terrorism Centre hotu Chris Miller chuan a sawi.

US-a firfiakte chu ralthuam leh thil dang hmanga pui ṭhinah al-Masri hi puh a ni a, khawvel puma firfiak pawl, foreign terrorist organisation-te nen thawk hoa puh a nih bakah, US-a firfiaka chetna hrang hrang thleng ṭhinah mawhphurtute zingah puh a ni bawk. Hengte avang hian US chuan kum 2018 December thla khan al-Masri hi man theih a nih thu a lo tichhuak tawh a ni. A thih dan chungchangah hian nimin thleng kha chuan FBI lam hian thuchhuah an nei lo a, NDS pawhin an thah dan chungchangah leh a kaihhnawihah hian chanchin kimchang a tarlang lo.

Inrinni liam ta khan Afghanistan khawpui Kabul-a education centre pawnah thihchilh bomb a puak a, hriat theih chinah mi 18 an thi. He thil thlengah hian mi 57 vel an hliam tih interior ministry chuan a tarlang. 

Inrinnia thil thleng chungchangah hian interior ministry thupuangtu Tariq Arian chuan thihchilh bomb tipuaktute hian education centre luh an tum thu a sawi a, mahse he centre-a security guard-te chuan an lo dan avangin pawn lamah hian bomb hi an tipuak ta niin a sawi. Bomb tipuaktute hi tute nge hriat a la ni lo a, Taliban lam chuan an tih a nih loh thu an sawi tawh.