Poland President-in Covid-19 a kai

Poland president Andrzej Duda chuan Covid-19 a kai tih kar liam ta Inrinni khan a sawi a, amah hnaihtute chungah ngaihdam a dil nghal bawk. 

Kum 48 mi Duda hi kar liam ta Zirtawpni khan test a ni a, a tukah hri a kai tih hi a twitter lamah a sawi chhuak a ni. Hri hi kai mah se a dinhmun erawh ngaihtuahawm a nih loh thu leh, a nupui nen an inkhunghran tur thu a sawi. Duda hian khawi aṭangin nge hri hi a kai tih finfiah a la ni lo.

Kar liam ta Zirtawpni khan Duda hian an ram khawpui Warsaw-a National Stadium chu a tlawh a, he hmun hi Covid-19 kaite enkawlna tura buatsaih mek a ni. Hri kaite enkawlna hmun a tlawh hian hmaituamna a hmang. Tun hnaia French Open hmeichhe champion kum 19 mi Iga Swiatek nen Duda hi Zirtawpni vek khan an inhmu a, Duda hian 'Gold Cross of Merit' award chu Iga hnenah hian a hlan a ni. 

Duda chuan hri a kai hmaa a mi hmuhte chungah ngaihdam a dil a, a chunga hriatthiamna nei turin a ngen. Symptom engmah a neih loh avanga meeting-te pawh nei a nih thu sawiin, in rinhlelhna nei ni se chuan tumah a tlawhpawh loh tur thu a sawi. Amah avanga in khunghran ngai eng emaw zat an awm tak avangin thupha a chawi a ni. 

Poland-ah hian Covid-19 kai hi mi 2,41,946 an awm tawh a, heng zinga mi 1,09,344 chu enkawl dam tawh niin, he hri thihpui tawh hi mi 4,351 an awm tawh a ni. 

Hri leng hi Poland ramah hian hluar hle mah se hri darh tur venna atana sorkarin khuahkhirhna a siamte duh lohna lantirin Inrinni khan mi tam tak an ram khawpui, Warsaw-ah an pungkhawm. 

Pung khawmte hi police-te chuan tear gas  hmangin an hnawt darh a ni.