Khawvel Lawrkhawm

Washington mall beitu nia hriat man

US Police-te chuanWashington hmarthlang lama silai nena mall beitu nia rinhlelh chu Inrinni khan an man.

Kar kalta Zirtawpni zan khan Cascade Mall, Burlington-a mall beihnaah hian mi panga an thi a ni . Police-te chuan pawikhawihtu nia rinhlelh, kum 20 mi hi Inrinni zan khan Burlington chhimthlang lam, mel 28 vela hla Oak Harbor-ah an man tih an sawi.

Mall beihnaah hian hmeichhe pali leh mipa pakhat an thi. Mall beitu hi thawmhnaw dum nena inthuamin, mall-a Macy's department store-ah silai a pawng kah a ni. Mahse pawi a khawih hnu hian police-te'n an man hmain a tlanbo hman a ni.

Russia leh Pakistan sipaiten nunchan zir dawn

Russia leh Pakistan sipaite chuan a vawi khatna atan nunchan an zirho dawn.

Ram pahnih sipaite nunchan zirhona neih tur atan hian kar kalta Zirtawpni khan Russia sipaite chuan Pakistan an thleng tawh a, sipai nunchan zirna hi Cherat hmunah an nei dawn a ni.

Cherat hi Khyber-Pakhtunkhwa province-a Nowhshera district-a awm a ni. October 7 thleng tactical drill an nei dawn a ni. Russia chuan media ṭhenkhatin Rattu-ah High Altitude Military School-ah drill nei tur anga an tarlan chu thu dik lo a nih thu a sawi. Sipai nunchan zirnaah hian ram pahnih aṭangin sipai 200 vel ve ve an tel dawn a ni.

Aleppo beihnaah mi 50 an thi

Syria sipaite chuan Russia sipai puihnain, Aleppo biala helho hmunte chu indo thlawhna hmangin nasa takin an bei a, mi 50 an thi nia sawi a ni.

Syrian Observatory for Human Rights Director, Rami Abdulrahman chuan indo thlawhnate hi an che nasa hle niin a sawi a, Aleppo khawpui chhung, chhak lama awmte pawhin hetiang tluka nasaa beihna hi an la tawng ngai lo niin an sawi. Beihpui thlaknaa thi hi Syrian Observatory for Human Rights chuan mi 50 vel niin sawi mah se, ṭhenkhat chuan mi za chuang an thi tawh niin an sawi thung.