France-in Calais camp a khar dawn

France President Francois Hollande chuan raltlante awmna, Calais camp chu khar a ni dawn tih sawiin, camp-a raltlan awmte chu khaw hrang hrangah sawn≠chhuah an ni dawn tih a sawi.

France hmarlama Calais camp awmna chu mihringte khawsakna atan a dinhmun a ṭha tawk lo tih sawiin, Hollande chuan he camp-a raltlan awm mek, mi 9,000 vel chu kar reilote hnuah sawnchhuah an ni ang, a ti. Calais camp hi 'The Jungle' tia sawi ṭhin a ni bawk.

President Hollande hian vawiinah Calais camp hi a tlawh dawn a ni.

Sorkarin Calais camp-a awmte hi khaw hrang hranga camp-ah sawn chhuah a tum a, mahse sawn an tumnaa tualchhung mite leh far-right politician-te chuan an duh lo hle a, an khuaa raltlan dah chu an duh loh thu an sawi.

Hollande chuan France ramah camp awm a duh lo tih sawiin, Calais camp-a awm mekte chu 'recepton and orientation centre' ah dah an ni dawn a ni, a ti. Camp-a awmte hi mi 40-50 te tein thla thum aṭanga thla li chhungin sawn darh tum a ni a, an rama awm theihna dan siamin a huam chinte chu France ramah an awm chhunzawm ang a, a huam loh chinte erawh chu an ram lamah thawn kir leh an ni dawn tih a sawi bawk.

Calais camp-a raltlan awmte hi Britain pan an tumna lamah police-te nen an intibuai fo a ni. Channel Tunnel kaltlanga Britain lam pan truck-a beh an tumna lamah mi eng emaw zat an lo chesual tawh bawk.