Philippines-in ramdangte inrawlh lo turin hrilh

Philippines President Rodrigo Duterte-a kaihhruai sorkarin an rama dan loa damdawi zuarte laka beihpui thlak a, Drugs War a puanah ramdangte chu inrawlh ve lo turin Philippines Foreign Minister Perfecto Yaday chuan UN General Assembly-ah a hrilh.

Kar kalta Inrinni-a UN General Assembly-a thu a sawiah, Yasay chuan President Duterte kaihhruai sorkar chuan an ram chu eirukna leh dik lo taka damdawi siam, zawrh leh hmansualna laka fihlim tir tumin theihtawp a chhuah a ni, a ti. "Kan hmalak dante chu ramchhung leh khawvel ramdangten dik lo takin min lo hmu a ni. Kan ramchhunga buaina leh harsatna kan neih mekte chinfel tuma kan beihnaah hian kan hlawhtlin theihna turin
ṭul loah chuan rawn inrawlh lo turin midangte kan ngen a ni", a ti.

May 9-a hneh taka Philippines President atana thlan tlin, Duterte hian thuneihna a chan hnuah an rama damdawi hluar lutuk tihrem tumin beihpui a thlak nghal a, dan loa damdawi zuar leh hmangsual nia puh mi 3,000 dawn chu kar 11 chhungin tihhlum an ni tawh a ni. Mi tam tak tihhlum an nih vang hian ramdangten an hlawh le a, United Nations ngei pawhin a lo sawisel tawh a ni.