African-American museum hmasa ber hawng

US President Barack Obama chuan African American history leh culture pholanna tur bik museum hmasa ber chu Wa≠shington DC-ah a hawng.

Kar kalta Inrinni khan President Obama leh a nupui, first lady Michelle Obama-te chuan National mall-a dolar maktaduai 540 senga siam, Smithsonian National Mu≠seum of African American History and Culture (NMAAHC) hi an hawng a ni. America rama mihang zinga president ni thei hmasa ber, Obama chuan, "America tana phurrit kan ni lo a, Ame≠rica ram tana zahna thlentu pawh kan ni hek lo. Keimahni hi America kan ni" a ti. Museum chuan mipuite hnena sal chungchang te, mi rethei, black activist leh zirtirtute chungchangte hriattirin thil an hriatchian phah dawn a ni, a ti.

Africa American museum siam hi kum 1915 aṭangin nawr a lo ni tawh a, kum 2003 khan President hlui George W Bush chuan sak phalna a pe a ni. Inrinni-a museum hawnna inkhawmah hian President hlui Bill Clinton, Vice President Joe Biden leh Georgia Congressman John Lewis te pawh an tel.

Museum-a dah tur hian thil chi hrang hrang 37,000 vel zet lakkhawm a ni a, a tam zawk hi mimalin an thawh a ni. Hengte hi section pathum - history, community leh culture-ah ṭhen an ni.