Japan-ah ram kang nasa tak thleng mek

Japan ram hmar lam, Iwate Precture-a Ofunato khaw bulah kar liam ta aṭang khan ram kang nasa tak thlengin, kum 30 chuang chhunga ram a kan nasat ber ṭum a ni. Ningani liam ta aṭang khan ram hectare 2,100 vela zau a kang tawh a, kangṭhelhtu 1,700 velin ram kang hi an ṭhelh mek a ni.

Official-te chuan ram kang vang hian a chhehvela cheng mi 4,600 chu hmun him lama insawnchhuak tura hriattir an nih thu nimin khan a sawi.

Fire and Disaster Management Agency chuan ram chhunga bial 14 aṭangin kangṭhelhtute hi tirh an ni tih sawi, helicopter 16 nen ram kang ṭhelh hna hi an thawk mek a ni. Pathainni thleng khan kangmeichhuak hian building 84 a ti chhe tawh niin a tarlang bawk.

Sorkar data aṭanga a lan danin, 1970 chho aṭang khan Japan ramah hian ram kang thleng zat hi a tlahniam hle a, mahse kum 2023 khan hmun 1,300 zetah ram kang hi a thleng leh a ni. Heng hi an ram boruak ro hunlai leh thli a tam hun, February - April inkarah te a ni ṭhin.