Gaddafi-a fapa thi turin a chungthu relsak
Libya ram hruaitu hlui, Muammar Gaddafi-a fapa Saif al-Islam chu Libya court chuan kum 2011 revolution-a pawikhawihna hrang hranga a inhnamhnawih avangin thi turin a chungthu a relsak. A rualin midang pariat pawh thi tura hrem an ni bawk.
Saif al-Islam leh midangte hi kum 2011-a Muammar Gaddafi-a kaihhruai sorkar laka lungawi lohna lantirtute chunga pawikhawih a, nawrh huaihawtte hrek beh tuma puh an ni. Kum 2014, April thla aṭang khan an thubuai hi ngaihtuah ṭan a ni.
Nimina a chungthu rel a nih lai hian Saif hi court-ah a inlan lo a, video link kaltlangin thu zawhfiah a ni.
Saif hi Zintan khuaah helpawl te'n an man a, tun thlengin an la chhuah duh lo a ni.
Kum sawmli zet Libya ram hruaitu lu ber lo ni tawh, Muammar Gaddafi hi kum 2011 October thla khan Libya tualchhung indona a thlen hnua sorkar laka helte'n manin an that a ni. Muammar Gaddafi paihthlak a nih hnu hian Libya ramah hian sorkar mumal a la ding thei lo a, pawl hnihte chuan thuneitu zawk nih an la inchuh reng a ni. Tunah hian sorkar pahnih a awm a, pakhat chuan an khawpui Tripoli chu hmunpuiah hmangin, sorkar pakhat zawk chuan khawchhak lama Tobruk khua chu hmunpuiah a hmang thung.
Tobruk sorkar hian Tripoli sorkar hi an pawm lo a, Saif pawh hi an hlan chuan a tlanchhuah mai an rin avangin an hlan duh lo a, mahse thubuai siamsak erawh an phalsak thung a ni.
Saif ruala thiam loh chantir zingah hian intelligence hotu hlui, Abdullah Senussi leh prime minister hlui Baghdadi Ali Mahmudi pawh a tel. Hetihlai hian politics lama mithiamte chuan, court thutlukna hian nghawng a neih vak an rin loh thu an sawi. Libya hian harsatna hrang hrang a hmachhawn mek avangin court thupekte pawh tam tak zawm mumal lohin a awm mek a ni. Gaddafi leh midang pariatte hian court-in hremna a pek hi court sang zawkah an appeal thei ang.