Coronavirus: China-in Wuhan City kalpawhna khar Hrileng vanga thi 17 tling

China rama coronavirus leng chu a darh zel a, nimin khan he hri vanga thi hi mi 17 tling tawhin a vei mi 500 chuang hmuhchhuah an ni tawh bawk. 

China sorkar chuan corona­virus hmuhchhuah ṭanna, Wuhan City kalpawhna te chu nimin aṭang khan a khar. Rel leh thlawhtheihna service te tihtawp a ni a, subway te pawh kharin, mipuite punkhawmna liantham buatsaihte pawh ṭhulh an ni bawk. Full-body proective suit hain doctor-te chuan he hri veite hi an enkawl mek a ni. 

Wuhan City-a chengte pawh phalna nei lo chu khawpui an chhuahsan phalsak an ni lo  bawk. Hei hi hri leng darh zel tur venna atan leh, khawpui chhunga chengte hriselna leh himna tur atana hmalakna a nih thu official chuan an sawi. 

Vawiin aṭang hian China Lunar New Year holiday hman ṭan a ni dawn a, he hun hmang tur hian khualzin tam tak chu China ramah hian an kal a ni. Hei vang hian he hrileng mek pawh hi a darhzau hle hlauhthawnna a nasa hle.

City official-te chuan an khawpui chu tlawh rih lo turin mipuite an ngen. Wuhan tourism and culture department chuan February 8 thleng atana group tour an buatsaihte pawh an ṭhulh vek a, khawpui chhunga tourist tlawh duh zual hmunte leh hotel liante chu activity lian tham buatsaih an tumte pawh ṭhulh tura tih an ni bawk. Museum-te pawh khar an ni bawk a ni. 

China National Health Commission chuan hrileng mek hi mihring leh mihringah inkai­chhawn theih a ni tih a sawi chiang tawh. Hetih rual hian he hri hi ran aṭanga lo chhuak nia ngaih a ni. Hei vang hian seafood market-ah pawh ramsa lam hralh khap nghal a ni. Police-te chuan khawpuia lut leh chhuah, ar leh ran phurtu motor-te pawh uluk takin an endik vek bawk.