Huckabee thusawiin sawizui a hlawh

US Republican presidential candidate, Mike Huckabee-a'n Iran nuclear deal sawisel a, President Barack Obama-a'n Israel chu a thihna tur kawng a zawh tir ta ti ang hiala a sawi chuan sawizui a hlawh a, Democratic party chuan a thusawi avang hian ngaihdam dil turin an phut.

Republican member tam tak chuan July 14-a world power ram paruk leh Iran-te'n Iran nuclear programme chungchanga inremna thuthlung an ziah chu an sawisel a ni. He inremna an ziah avang hian UN leh khawthlang ramte'n Iran an hrekna hrang hrangte chu an hlip dawn a ni.

Israel Prime Minister Benjamin Netanyahu pawhin nasa takin nuclear deal hi a lo sawisel tawh a, Iran hrekna te hlih a nih dawn avangin Iran tan hian nuclear ralthuam siamna tur hmanruate lakluhna hun an hawnsak zawk dawn a ni, a ti.

US Congress-ah hian Republican lam an tam zawk a, September 17 thleng he inremna siam tawh hi pawm emaw, hnawl emaw turin hun an nei.

Kar kaltaa interview a neihnaah, Arkansas governor hlui Huckbabee hian President Obama foreign policy-te chu sawiselin, America chanchina thil hlawhtling lo leh nghawng nei lo ber a ni, a ti. "Iran mite a ring thei hi thil awm lo tak a ni. Hetianga a ring a nih chuan, Israel mite chu 'oven' kawngka a zawhtir a ni," a ti. Oven hi Indopui II hunlaia Nazi-te'n Juda-te mi tam tak an lo suatna ṭhin camp sawina atan a hmang a ni.

"Iran deal hi thil atthlak tawp a ni. Congress-ah ngaihtuah a nih hunah Democrats leh Republican-te mai bakah, America mipuite pawhin an hnawl ngei tur a ni. Inremna an siamte hi a vaiin ka chhiar chhuak vek a, tihtawp a ngai a ni," tiin Huckabee chuan a sawi.

Huckabee hi foreign policy lam ngaihven leh thiam nia sawi a ni a, kum 2008-a US President thlan ṭum khan Republican president candidate nih a lo tum tawh a, mahse a chak zo lo a ni. Hemi hnu hian media lamah a thawk a ni.