Nigeria rama bomb puakah mi 15 an thi

Nigeria hmarchhak lam, Damaturu khuaa bazar hmunpuiah Pa­thianni khan hmei­chhe naupang kum 10 miin thih chilh bomb a tipuak a, mi 15 an thi a, mi 47-in hliam an tuar.

Bomb tipuaktu hian zing dar 9.50 velah, bazar luhna gate bulah bazar kal turte security force-te'n an endik laiin a bomb pai hi a tipuak a ni. Eng pawl mahin an tihah chhal lo mah se, Boko Haram helho tirh nia rin a ni.

Damaturu khua hi Yobe state khawpui a ni a, Yobe state bakah Borno leh Adamawa state-te chu Boko Haram helpawlte pawikhawih hluarna hmun a ni. Kum 2009 aṭang khan Boko Haram-te pawikhawihna avang hian mi 15,000 chuang an thi tawh a, mi maktaduai 1.5 vel chenna nei loin an awm phah tawh bawk.

May thlaa Nigeria President atana Mu­ham­madu Buhari lak­luh a nih hnu khan an ram chhunga helho pawikhawihna avangin mi 800 chuang an thi tawh bawk. Buhari chuan Islamic State (IS) firfiak pawl nena inzawmna nei, Boko Haram-te laka beihpui thlak a, hneh ngei chu a hna hmasa tur a ni, a ti.

July 18 khan Dama­turu khuaah hian hmei­chhe naupang pathum chuan thihchilh bomb an lo tipuak tawh bawk a, mi 13 in an thihphah a ni.