Somalia-a hotel-ah bomb a puak
Somalia khawpui, Mogadishu-a Jazeera Palace Hotel-ah Pathianni khan bomb chak tak tihpuah a ni a, mi 13 an thi a, mi 40 chuangin hliam an tuar.
Bomb tihpuahna hotel hi airport bul hnaia awm a ni. Somalia rama firfiak pawl, al-Shabab chuan an pawl tih niin an sawi.
Al-Qaida firfiak pawl nena inzawm, al-Shabab hian African Union sipai leh Somalia sorkarin an pawl laka beihpui a thlak avangin a chhan letna atan hotel hi an bei niin an sawi.
Jazeera Palace Hotel hi ramdang palaite'n thlenna atan an hmang fo a, a building-ah hian China, Qatar leh Egypt embassy-te pawh a awm nghal a ni. Tun hma lamah pawh he hotel hi beih a lo ni tawh a ni.
US chuan Mogadishu-a pawikhawihna thleng chu a dem thu a sawi a, National Security Council chuan thuchhuah siamin, "Pawisawi lo civil mite rawng taka beih an ni hi kan dem takzet a ni," a ti.
Kar kalta Inrinni khan al-Shabab nia hriatte chuan Somalia parliament member pakhat leh prime minister office-a official chu an lo kaphlum tawh bawk.