Saudi Arabia-in Yemen-ah inkahhai a puang

Kumin March thla aṭanga Yemen hel laka beih­pui thlaktu, Saudi Arabia kaihhruai Arab ṭang­rual ramte chuan ni nga chhung inkahhai puangin, Yemen mipuite tana chhawm­dawl­na pekna hun a hawn­sak.

Kar kalta Inrinni khan inremna hi siamin, inkah­hai hi nizan zanlai aṭanga hman ṭan a ni.

Saudi Press Agency official chuan thuchhuah siamin, inkahhai an puan chhunga Shiite Houthi helte'n an inremna siam pal­zuta zawnga an che a nih chuan, ṭangrual pawlte chuan rang takin an chhang let ve nghal dawn tih a sawi.

SPA chuan inkahhai hi Yemen President Abe­drabo Mansour Hadi ngenna anga siam an ni tih a sawi. President Hadi hi Houthi helte hian paih­thlak an tum avangin Saudi ramah hian himna zawngin a tlanchhe mek a ni.

President Hadi thlawp­tu, Yemen sipaite chuan Houthi hel kut aṭangin chhim lama an khawpui pawimawh, Aden hmun tam zawk chu an la let leh tawh a ni.

UN hmalaknain Arab ṭangrual ram leh Houthi helte hian ṭum hnih inkahhai an puang tawh a, mahse inremna siam hi an bawhchhe ve ve a ni. UN chuan Yemen tualchhung buaina thleng vang hian mi 3,640 an thi tawh a, an zinga a zahve vel chu civil mi niin a sawi.