Spelman College-in Bill Cosby nena inzawmna a titawp

United States, Georgia-a African-American hmeichhe college, Spelman College chuan comedian Bill Cosby nena an inzawmna a titawp.

Bill Cosby hian kum, 1988 khan Atlanta-a Spelman College tan hian professorship fund, dollar maktaduai 20 a thawh a, hei hi amah leh a nupui Camille hming chawiin William and Camille Olivia Hanks Cosby Endowed Professorship tia vuah a ni. Mahse mipat hmeichhiat lam hawia hmeichhe eng emaw zat mawi lo taka khawiha puh a nih hnuin, college hian nikum aṭang khan professorship hi a titawp lailawk tawh a ni. Kar kalta Zirtawpni khan Bill Cosby nena an inzawmna hi titawpin, a sum thawh aṭanga hman ban la awmte pawh a pe kir leh dawn a ni.

Kum 78 mi, Cosby chuan tih dik lo engmah a nei lo a, thubuai pawh siamsak a ni lo tih a sawi thung. Hetihlai hian hmeichhe 12 chuang chuan anmahni khawihah Cosby hi an puh.