Taliban-te'n Afghanistan police hmunpui an la
Afghanistan-ah Taliban firfiakte'n ni thum zet an inbeih hnuah police hmunpui an la a, police 100 chuang zet chu firfiakte kutah an inpe bawk.
Taliban firfiakte an lak hi an ram hmarchhak lam, Badakhshan province-a Tirgaran base a ni. Hei hi ṭum khata Afghan security force-te firfiak kuta an inpek ṭam ber ṭum a ni.
Police hmunpui hi Wardoj district-a awm a ni a, ruahsur nasa vangin kalpawh theih loin an awm mek tih Badakhshan province police hotu, General Baba Jan chuan a sawi. Police-te pui tura sipai tirh luh an nih loh chhan erawh a sawilang lo a, mahse ruah a sur nasat avang leh a awmna hmun hi tlang chhengchhe kar a nih avangin thlawhtheihna tan pawh ṭum a harsa ṭhin nia sawi a ni.
Badakhshan provincial council hotu, Abdullah Naji Nazari chuan, "Ni thum chhung zet police leh firfiakte hi an inbei a, hemi chhung hian anmahni puitu tur tirh an ni lo. Hei vang hian an tan chuan inpek mai loh chuan tih theih dang a awm tawh lo a ni," a ti. General Jan chuan local police commander pawhin Taliban-te hi zawmin, police hmunpuia ralthuam leh silai mu an kawlte pawh a firfiakte kutah hian a hlan vek tawh tiin a sawi.
Taliban-te pawhin thuchhuah siamin, police officer 110 te manin, an hmunpui pawh an laksak thu an tarlang.