Russia President in hnathawktu nuai 11 a ban

Russia President chuan Interior Ministry hnuaia thawk zinga 10% a ban a, a bante hi an vaiin mi 110,000 an ni.

Russia sorkar sum din­hmun hi a chhiat zel avangin kar kalta khan President hian Interior Ministry-a hnathawktu 10% a titlem turin thu­tlukna a lo siam tawh a ni. Russia ram sum dinhmun hi kumin January aṭanga April thla chhung khan 2.2% in a tlahniam a ni.

International Monetary Fund (IMF) chuan kumin chhungin Russia gross domestic product (GDP) hi 3.8% in a tlahniam ang a, nakkumah 1% in a tlakhniam belh leh dawn tiin a chhutsak bawk.

Sum lama a harsatna sutkian a, an ram sum leh pai dinhmun siamṭhatna kawng khat atan Russia sorkar chuan a sum hmanchhuah tur chu 10% dawna tihtlem a tum. Mahse mithiam ṭhenkhat chuan hetianga inrenchemna kalpui a, a inhrek vak chuan an ram sum dinhmunin a chhiatpui zawk an ring thung.

President Putin chuan an ram sum dinhmun chhiat avang hian March thla khan a hlawh chu 10% in a lo tihniam tawh a, sorkar agency zawng zawngte chu an sum hmanchhuah titlem vek turin a hrilh a, defence department erawh chu a huam tel lo.

Russia hi a ṭhenawm ram, Ukraine tualchhung buainaa inrawlh leh, Ukraine sorkar laka helte thlawp leh ṭanpuia puh a ni a, hei vang hian khaw­thlang ramte'n an hrek mek a ni. Khawthlang ramte hrekna avang hian Russia-a foreign invest­ment chu a tlahniam nghal a, hei bakah hian a sum lakluhna pawimawh oil man pawh nasa takin a tlahniam bawk a, hei hian Russia economy a nghawng na hle.