SKorea President hlui Yoon manna tur thupek hnawl

South Korea-a Seoul District Court chuan president hlui Yoon Suk Yeol manna tur thupek, arrest warrant tih chhuah tawh chu nimin khan a hnawl a, jail aṭangin chhuah nghal a ni.

Yoon Suk Yeol hi nikum December 3-a an rama sipai thuneihna sang pekna tur, martial law a puan kaihhnawihah manna tur thupek hi tih chhuah a ni. Martial law a puan hi an ram danpui kalh nia sawiselna nasa tak a awm a, legislator-ten National Assembly-ah lungrual taka an hnawl avangin darkar ruk hnuah a hlip leh nghal bawk. Mahse he thil vang hian Parliament-ah a chungthu ngaihtuah tura rel niin, President a nihna aṭangin chawlh tir a ni bawk.

Yoon-a ukilte chuan thla hmasa khan Seoul District Court-ah hian January 19-a manna tur thupek tih chhuah a ni leh, hemi avanga hren zui a ni chu dan kalh a ni tiin a khing let a ni. Court-a document an thehluhah, Yoon hren theih hun bituk chin a zawh hnua arrest warrant hi tih chhuah a ni tiin, dan ang taka a chungthu ngaihtuah chhunzawm a nih theihna turin hren mek a nihna chu hnawlsak turin an ngen.

Martial law a puan avanga South Korea President a nihna aṭang Yoon ban hlen a ni emaw, President dinhmun chelh tir leh emaw chungchanga thutlukna chu Constitutional Court thutluknaah a innghat a ni. Ban tuma hmalakna hi Constitutional Court hian a pawm a nih chuan official-in ban a nih thu hi a puang ang a, hemi aṭanga thla hnih chhungin inthlan buatsaih a ni bawk ang.

Investigator-te chuan Yoon-a'n martial law a puan hi an ram laka helna tlukpui a ni tiin, he thubuaiah hian thiam loh chantir a nih chuan tih hlum emaw, damchhung tang tura hrem emaw a ni thei dawn a ni.