Pope Francis-a'n lawmthu sawina audio message ti chhuak

Roman Catholic kohhran hruaitu, Pope Francis chuan kar thum liam taa damdawi-ina a luh hnuah a vawi khatna atan a tana ṭawngṭaitute hnena lawmthu sawina, audio message chu Ningani khan a ti chhuak.

Kum 88 mi, Pope Francis lawmthu sawina hi a puala zantin ṭawngṭaina hun hmanna, St. Peter's Square-ah tih chhuah a ni. Thawk lama harsatna a neih avangin thusawi pawh a harsat a, a aw pawh a zawi hle a, Spanish ṭawngin lawmthu hi a sawi a ni.

St. Peter's Square-a ṭawngṭaina hun hman hruaitu, Cardinal Ángel Fernández Artime chuan Pope lawmthu sawina tih chhuah a nih hma hian mipuite hnenah chanchin lawmawm tak, thilpek lawmawm tak hrilh tur a neih thu hrilhin, a thusawi hi an ti chhuak zui a ni.

Vatican chuan Pope dinhmun hi nitin vawi hnih a ti chhuak zel a, mahse February 14-a Rome-a Gemelli hospital-a dah luh a nih aṭang khan a thlalak emaw, video emaw tih chhuah a la nei lo thung.

Doctor-te chuan Pope hian ngai a awh chho zel a, thawk lamah harsatna dang emaw, khawsik emaw a nei tawh lo niin an tarlang a, chawl hahdamin ṭawngṭaina hun pawh a hmang thei tih an sawi. Hemi rual hian a dinhmun erawh a hlauhthawnawm tho nia hriat a ni.