Syria security force leh President hlui thlawptute intibuai

Syria president aṭanga paihthlak, Bashar al-Assad a thlawptute leh Syria security force-te chu Ningani khan Latakia province-ah inbeiin mi 70 chuang an thi a, hliam tuar eng emaw zat an awm bawk.

Buaina chhuahna hmun hi Jableh khua leh a chhehvelah niin, security force-te hian Assad-a thlawptu intelkhawm thar lehte dap chhuah hna an thawk a ni. Assad-a hnuaia commander Suhail al-Hassan nena inzawmna nei, armed group chuan security patrol leh checkpoint-te lo beiin, inkahna a thleng zui a ni. Inbeihna thlenga thi zingah hian security force mi leh sa 16 telin, Assad-a thlawptu lam mi 28 an tel bawk.

Al-Hassan hi 'The Tiger' tia a hming vuah a ni ṭhin a, President hlui Assad-a hnuaiah khan military commander pawimawh tak niin, Syria mipuite beihna rapthlak tak thlentu a ni tiin Latakia security director Lieutenant Colonel Mustafa Kunaifati chuan a sawi.

Basha al-Assad hi nikum December thlaa a kaihhruai sorkar laka hel, Islamist Hayat Tahrir al-Sham (HTS) group-in an ram khawpui, Damascus an lak hnuah himna zawngin an ram hi chhuahsanin a chhungte nen Russia ramah an tlanchhia a ni. Syria ram kum 13 chhung ro a rel lai hian rawng taka rorelah puh a ni a, mipuite dikna chanvo palzut sak leh, civil mite laka rawng taka che ṭhinah puh a ni. A kaihhruai sorkar dodaltu civil mite lakah chemical ralthuam pawh hmangah puh a ni bawk a, ram tam takin President a nihna aṭanga bang tur pawhin an lo nawr fo tawh bawk.