Covid-19 dona kawnga beidawng lo turin WHO-in mipui a chah

World Health Organisation (WHO) chuan khawvel ram hrang hranga Covid-19 hri leng thawh hnihna thleng leh mekah hri kai an pung chho chak leh hle a, mahse khawvel mipuite chu hri dona kawnga beidawng lo turin a chah.

WHO hotu Tedros Adhanom Ghebreyesus chuan ram tam takah hri lengin ziaawm lam a pan hnuah, hri leng thawh hnihna a thleng chho leh mek a, Covid-19 vaccine a la awm loh avangin hri dona kawnga rilru beidawng leh chau an awm chu a hriatthiampui thu a sawi. 

Hemi rual hian hri darh zel tur venna atana theihtawpa hma lak chhunzawm zel a ṭul a ni, a ti. 

"In lam aṭanga hna thawh a ngai a, naupangten school an kal thei lo a, ṭhiante leh chhungte nen kan intihlim thei lo a, kan hmangaih thite sunnaah pawh kan tel thei lo a ni. Nun hi a hahthlakin a chauh thlak hle. Mahse beidawng thei kan ni lo, kan beidawng tur a ni lo," tiin Ghebreyesus chuan a sawi. 

WHO emergencies chief Michael Ryan pawhin ram hrang hrangte chu hri dona kawngah tha thlah lo a, hri darh tur venna atana theihtawp chhuah chhunzawm zel turin a ngen. 

John Hopkins University-in a tarlan danin, khawvel pumah Covid-19 kai hi mi maktaduai 43 chuang an awm tawh a, hripui thihpui hi maktaduai 1.2 vel an awm tawh bawk.