Afghanistan-a inbeihna thlengah civil mi 6,000 dawn thi tawh

Afghanistan rama sokar sipai leh Taliban firfiakte inbeihna thlengah, kumin kumtir aṭanga September thla thleng khan civil mi thi chu 6,000 dawn an tling tawh tih UN Assistance Mission in Afghanistan (UNAMA) chuan a tarlang. 

UNAMA report chuan January-Sep­tember thla chhunga inbeihna thleng vanga thi zingah civil mi 5,939 awmin, hliam 3,822 an awm bawk tih a sawi. Thla kua chhunga civil mi thi leh hliam awm zat hi nikum nena khaikhin chuan 30% in a tlem zawk thung. 

Tualchhunga inbeihna thleng vanga civil mi thi zinga 45% chu Taliban firfiakte mawhphurhna niin, 23% chu sorkar sipaite mawhphurhna a ni a, 2% chu US kaihhruai ṭangrual sipaite mawhphurhna nia sawi a ni bawk. 

Taliban leh sorkar aiawhte inremna kawng zawnga inbiakna nei mah se, ram chhunga firfiakte pawikhawihna a la thleng chhunzawm reng a ni. Thih chilh bomb leh kawng sir bomb kam an tihpuahte chu mi tam takin an thihpui a, hetihlai hian Afghanistan sipaite pawhin firfiakte beihna tura beihpui an thlak ṭhinah civil mi eng emaw zat an thi tel fo bawk a ni.