Thailand PM in ban a tum loh thu sawi nawn

Thailand prime minister Prayuth Chan-ocha chuan Parliament session-ah eptu party-ten bang turin nawr zui leh mah se, PM a nihna aṭanga ban a tum loh thu a sawi.

Zirlai huaihawtin prime minister ban phut leh, an ram lal thuneihna tihnepna tura danpui siamṭhat phutin hun rei tak nawrh huaihawt a ni tawh a ni. Nawrh huaihawt vang hian ram pumah state of emergency pawh puan a lo ni tawh bawk a, mahse hei hi tihtawp a ni tawh  thung. 

PM chuan tualchhung buaina thleng mek avangin Parliament special session a ko a, an ram dinhmun tawn mek an sawihonaah eptu member-te chuan bang turin an nawr zui ve leh a ni. Mahse Prayuth chuan an ramin harsatna a tawh mekah tlanchhiat a tum lo tih sawiin, ban a tum lo tih a sawi. 

Prayuth chuan an ramin harsatna a tawh mek chungchang ngaihtuahtu tur committee din a remti a, hemi rual hian nawrh huaihawt mekte be turin tu ber nge biak tur a hriat loh thu a sawi. "Hruaitu an nei lo a, an vaiin hruaitu an ni vek mai a ni," a ti.