Louisiana cinema hall-a silai hmehpuahah mi pathum an thi
US, Louisiana state movie theatre-ah Ningani zan khan mi pakhatin silai hmetpuakin mi pahnih a kaphlum a, amah a inkaphlum zui bawk. Silai hmehpuahah hian mi dang pasarihin hliam an tuar bawk a ni.
Kum 2012-a Colorado theatre-a silai hmetpuak a, mi 12 kaphlum a, midang 70 kap hliamtu chu thi turin Ningani khan a chungthu relsak a ni a, court thutlukna tihchhuah a nih hnuah Lafayette khuaa Grand Theatre-ah pawikhawihna hi a thleng ve leh nghal a ni.
Louisiana Governor Bobby Jindal chuan, "Hetianga pawikhawihna rapthlak tak thleng ṭhin hian mi tithinrimin mi tilungngai ṭhin a ni." Intihlim tura kal, midangte chunga pawikhawihna thlengah hian chhuanlam tling engmah a awm lo, a ti.
Police-te chuan silai hmetpuaktu hi mipa kum 58 mi, mi ngo a nih thu an sawi a, a hming erawh an puangzar lo.
Pawikhawihtu hian Grand 16 theatre-a 'Trainwreck' show en tuma kalte chu a pawng kah a, a silai a hmehpuah lai hian theatre-ah hian mi 100 vel an awm nia sawi a ni. Governor Jindal chuan hliam tuarte hi damdawi-inah kanin, an huaisennate a fak a ni.
Silai hmehpuah a nih hian theatre-a awm zinga zirtirtu pakhat chu a ṭhiannu chhanhim a tumna lamah a keah kah fuh a ni a, mahse hliam tuar chung hian midangte warning pe turin fire alarm chu a tiri a ni. Lafayette Police hotu, Jim Craft chuan a officer-te chuan ṭanpui tura ngenna an hriat veleh an thawkchhuak nghal tih a sawi.