US-in blacklist-ah Singapore shipping firm a telh

US chuan Singapore-a shipping firm, Senat chu North Korea nena inzawmna neia puhin blacklist-ah a telh.

US Treasury chuan Senat Shipping firm hian UN hrekna hnuaia awm mek, NKorea company a pui a, ralthuam a lakluhna kawngah a ṭanpui ṭhin a ni, a ti.

Blacklist-a telh a nih avangin Senat Shipping firm hian US-a a thil neihte khawih chet theih loha hrensak a ni dawn a, hei bakah hian US mite chu Singapore firm nena sumdawnna kawnga thawhdun an khapsak nghal bawk.

Senat shipping chuan US-in blacklist-a a telh chungchangah thuchhuah engmah an la siam lo a, mahse US Treasury chuan company president Leonard Lai hnenah an thutlukna siam hi an hriattir tawh tih a sawi.

Singapore shipping firm hi North Korea firm, Ocean Maritime Management Company (OMMC) thawhpuiah puh a ni. Kum 2013 khan OMMC lawng hi Cuba aṭanga a kalchhuak chu Panamanian thuneitute manin, lawngah hian sipai ralthuam eng emaw zat a phurh rukte hmuhchhuah a ni. US chuan Senat hian OMMC-a bungraw phurh tur lei te, a lawng siamṭhat hna thawh leh thawktu lak pawh a ruahman vek niin an tarlang.

United Nations leh US hian OMMC hi NKorea rama ralthuam phurh ruk a tuma vangin kum 2014 July thla aṭang khan a hrek a ni. UN hrekna hnuaiah, NKorea hi ralthuam lian lakluh leh a thawnchhuah khap a ni.