SAfrica President chenna-in chei nan sum seng hnem

South Africa parlia­mentary committee chuan President Jacob Zuma mi­mal in chei ṭhatna atana sorkar sum, dollar maktaduai 23 zet sen chu an chei dan nena enin a inphu lo, a ti.

Nkandla-a President Zuma chenna in chei ṭhat hi committee chuan a enfiah a, hnathawh hi a ṭhat tawkloh avangin sum sen nen a inphu loah an ngai. Hetihlai hian sorkar lam chuan venhimna tikhauhna atan president chenna-in thuamṭhat hi a ngai tiin a sawi.

Public Protector Thuli Madon­sela-i chuan president chenna-in chei ṭhat a nih dan chungchangah hian report, phek 400 chuang zeta chhah a thehlut a, President Zuma chu dik lo taka hlawkna telah a puh.

Madonsela-i chuan in cheiṭhat­na atana sum pek hmang hian swimming pool, ar leh bawng vulhna hmun, amphitheatre-te siam tel a nih thu a sawi a, heng siamna sumte chu pe kir turin President a phut.

Mahse Police Minister Nkosinathi Nehlko chuan a hrana report siamin, President Zuma chuan a chenna-in cheiṭhat a nih danah tih dik lo a nei lo a, in cheiṭhat hna chu a himna atan a pawimawh a ni, a ti. President chenna-in pawn lama barrack leh clinic siamna atan dollar maktaduai 10.8 hman a ni, a ti. Hei hi rorellai leh eptu MP-te chuan sawiselin, sum senral nia sawi hi a tam lutuk niin an ngai.