Iran deal duh loin New York-ah kawng zawh

World power ram paruk leh Iran-in kar kaltaa Iran nuclear deal an siam chu khawvel leh Israel ram tan a him lo nia sawiin, Nilaini khan inremna siam duh lohna lantirin US-a New York khawpuiah mi tam takin kawng an zawh.

Mipui lungawi lo te hi Times Square-ah an kal khawm a, US Congress-a nuclear deal hi ngaihtuah a nih hunah hnawl turin thuneitute an ngen. Kawng zawhnaah hian Republican hruaitute pawh an tel.

Kawngzawh hi mi 10,000 chuang zet an tling a, thusawitu zingah hian New York Governor hlui George Pataki, Jerusalem Post senior contri­buting editor Caroline Glick, Manhattan district attorney hlui Rober M.Morgenthau, Congressman hlui Allen West leh Investigative Project on Terrorism dintu Steven Emerson-te an tel.

Hetihlai hian US Secretary of State leh senior official-te chuan Congress-a ngaihtuah a nih hmain member-te chu inremna an ziah tak chungchang hi a hranin an hrilhfiah a ni. Mahse Congress member ṭhenkhat chu Iran deal chungchangah hian an rilru a la hmin lo hle nia sawi a ni. Congress hian September 17 thleng Iran deal hi pawm emaw, hnawl emaw turin hun a la nei a ni.

New York-a kawngzawhte chuan Iran nuclear deal chungchang nasa taka sawiseltu, Israel Prime Minister Benjamin Netanyahu chu an thlawp thu an sawi.