Nepal ṭanpuina pe dawn

Kumin April thlaa lirnghing na takin a sâwi vanga chhiatna rapthlak tak thlenna, Nepal ram ṭanpuina atan China chuan a sum faiin dollar maktaduai 10 a pe dawn.

Ṭanpuina sum hi Post-Disaster Reconstruction Aid Project Plan hnuai­ah, lirnghing thil tihchhiat­te siamṭhatna atana pek a ni ang. Hemi chung­changah hian ram pahnih aiawhte chu nimin zing khan Nepal khawpui, Kath­mandu-ah an inbia a, inremna thuthlung an ziak nghal. MoU hi China Ministry of Commerce (MOC) vice repre­sentative, Zhang Xiang­chen leh Nepal Finance Minister Suman Prasad Sharma-te'n an ziak.

"China chuan Nepal-in hma a sawn a, ngai a awh chhoh thuai kan duhpui hle a ni. A indin thar lehna tura kan pui thei tur pawh hi kan lawm hle a ni," tiin Zhang chuan a sawi.

Nepal Minister Shar­ma pawhin lawmthu sawiin, China chuan kawng tam takin a pui tawh a, a puih chhun­zawm zel avangin an lawm hle tih a sawi. Tuna ṭanpuina sum a pek chu in chhiate siamṭhatna atan leh, lirnghing tuarte chhawmdawlna atan hman a nih tur thu a sawi a, mahse an hmanna turte hi a hmain uluk takin an lo enfiah dawn tih a sawi.

Nepal sorkarin lir­nghing vanga thil tam tak chhia chei ṭha tura hma a laknaa June thla khan World Bank (WB) chuan dollar maktaduai 300 hmantir a lo remti tawh bawk. WB Board of Executive Directors chuan Nepal tana loan pekna tur hi pawmin, dollar 300 zinga 200 chu in chhiate siamṭhatna atan hman a ni ang.