China-in Ai Weiwei passport a pe kir

China sorkar chuan sorkar kalphung a sawisel avanga kum li kaltaa a passport an laksak, artist Ai Weiwei-a passport chu Nilaini khan a pe kir leh.

Ai hian Nilaini khan Chinese passport a kenglai thlalak hi a Instagram-ah a dahchhuak a, Germany-ah a hriselna dinhmun enfiah tur leh a fapa tlawha kal a tum thu a sawi.

Kum 2011 khan thuneitute chuan Ai hi manin thla thum chhung thubuai siamsak loin an hreng a ni. Hemi hnu hian a design firm chu US dollar maktaduai 2.4 chawi tura tih a ni bawk. Hetianga hremna a tawh chhan hi China rama rorellai, Communist Party leh sorkar a sawisel ṭhin vang nia ngaih a ni. Lemziak leh online profile hmangin China rama rorelna dik tawk loh dante a tarlang fo a ni.

Britain-a Royal Academy of Arts chuan Ai hian a passport a neih kir leh tak avangin September thla hian major exhibition nei turin London-ah a kal dawn tih a sawi.

Man a nih hmain Ai hian China ram chhunga thil thleng dik tawk lo awmte a sawichhuak fo a, kum 2008-a lirnghing vanga school building sak ṭha tawk lo chima zirlai tam tak an thih phah thute a sawichhuak a ni. China sorkar chuan blacklist-ah telhin, state media-te chu Ai-a chungchang leh a hmingte sawilang ngai lo turin an ti a, hei bakah hian social media lama thil a post khapsak a ni bawk.