Guamtanamo Bay kharna tur tifel hnai
US sorkar chuan mitang khirh bik a dahna hmun, Guantanamo Bay kharna tura ruahmanna chu a tifel hnai tawh.
White House thupuangtu, Josh Earnest chuan detention camp khar hi an ram himna atan a pawimawh tiin a sawi.
US President Barack Obama chuan kum 2008-a US President atana thlan tlin anih aṭang thla hnih hnu lek khan Guantanamo Bay khar a nih tur thu hi a sawi a ni. He hmuna tangte chu hemi kum aṭang hian a tahtawla sawnchhuah an ni a, tunah hian mi 122 tang an la awm mek a ni.
Guantanamo Bay-a tang an tam ber chu kum 2003 kha niin, mi 684 tantir an ni.
Kum 2001, September 11-a al-Qaida firfiakte'n US an beih hnuah, President George W Bush-a sorkarna lai, kum 2002 khan Guantanamo camp hi din a ni a, firfiaka rinhlelh leh pawikhawihtu hlauhawm zual, thu zawhfiah tura tihte leh indona hmuna pawikhawihna thlentute dahna atana ruahman a ni.
He camp hi Cuba-a Guantanamo Bay Naval Base hmuna awm a ni. Mahse he hmuna tangte hi hun rei tak thubuai siamsak loa hren an nih ṭhin avang leh, thu an zawhfiah dan te chuan sawisel a hlawh fo a ni.