Myanmar-in thingzai rutu damchhung tang turin hrem

Myanmar sorkar chuan a ram hmar lama thingzai phur rutu, China mi 153-te chu damchhung tang turin a hrem.

Myanmar sorkar hian nikum aṭang khan a ram­ngawte humhalhna kawng khat atan ram pawn lama thingzai tawlh chhuah a khap a ni. Thiam loh a chantir, China mite hi kumin January thlaa sipai­te'n thingzai tawlhru ṭhinte laka beihpui a thlaknaah China ramri bul, Kachin state-a an mante an ni.

Sipaite'n an man zing­ah hian rawlthar kum 17 mi pahnih an awm a, an pahnih hian kum 10 tang tura hrem an ni. Hetihlai hian hmeichhe pakhat an man chuan ruihhlo a lo kawl tel avangin kum 15 hremna pek belh a ni thung. Myanmar ramah hian damchhung tang tura hremte hi a tlangpuiin kum 20 chhung tantir an ni ṭhin.

China Foreign Minis­try thupuangtu, Lu Kang chuan an mi leh sa mante chu thingzai tura bum luh an ni tiin, Myanmar sorkar hnenah pawh an chungchang thu hi a lo thlen fo tawh tiin a sawi.