Israel PM-in Iran deal a sawisel zui zel

Israel Prime Minister Benjamin Netanyahu chuan world power ram paruk leh Iran-in nuclear deal an siam tak chu a sawisel chhunzawm zel.

Thawhlehni khan PM Netanyahu hian Jerusalem-ah Italy Prime Minister Matteo Renzi a kawm a, a hnua joint press conference an neihah Iran nuclear deal chu Israel, Middle East, Europe leh khawvel pum tan a him lo a ni, a ti.

Netanyahu chuan inremna siam tak chu thil tihsual lian tak a ni tiin, inremna an siam avanga khawthlang ramte'n Iran an hrekna an hlih tur chu Iran-in nuclear ralthuam siamna hmanrua lakluhna remchangah a hmang dawn tih a sawi.

Israel hian Iran nuclear deal siam tura inbiakna an neih aṭangin nasa takin a lo dodal tawh a, a sawisel nasa ber zingah PM Netanyahu hi a tel a ni. Thawhlehni vek khan an ram tlawhtu, US Secretary of Defence Ashton Carter hnenah pawh nuclear deal a duh loh thu hi a sawilang tawh bawk.

Italy PM Renzi chuan Iran nuclear deal chungchangah chuan Israel nen an ngaihdan inang lo mah se, firfiaka chetna do let kawngah an thawkdun zel dawn tih a sawi. Renzi hian nimin khan Israel parliament, Knesset-ah thu a sawi.